आइतबार नेपाल स्टक एक्सचेन्ज (नेप्से)मा सानिमा रिलायन्स लाइफ इन्स्योरेन्सको बोनस सेयर सूचीकृत भएको छ । कम्पनीको ७६ लाख ९० हजार ६५२ कित्ता बोनस सेयर सूचीकृत भएको हो। कम्पनीले असोज २३ गते सम्पन्न वार्षिक साधारण सभाबाट पारित १८.३८११ प्रतिशत बोनस सेयर सूचीकृत गराएको हो ।अब उक्त बोनस सेयर सम्बन्धीत सेयरधनीको हितग्राही खातामा आएपछि कारोबार गर्न पाउनेछन् ।  

कामना सेवा विकास बैंकले ३३ हजार ८५२ कित्ता संस्थापक सेयर बिक्रीमा ल्याएको छ। यस सेयरमा अब जो कोही व्यक्ति, कम्पनी, वा विभिन्न संघ संस्थाहरूले आवेदन दिन सक्नेछन्। पूर्वमा यो सेयर केवल विद्यमान संस्थापक सेयरधनीलाई मात्र बिक्रीमा ल्याइएको थियो, तर उनीहरूले खरिद नगरेपछि अब सर्वसाधारण लगानीकर्ताले पनि यस सेयरमा आवेदन दिन सक्ने अवसर प्राप्त गरेका छन्। इच्छुक लगानीकर्ताले सेयर खरिद गर्न माघ ४ गतेदेखि ७ दिनभित्र बैंकको केन्द्रीय कार्यालय, ज्ञानेश्वर, काठमाडौंमा आवश्यक कागजसहित निवेदन दिनुपर्नेछ।

खानी खोला हाइड्रोपावर कम्पनी लिमिटेडले १२औं वार्षिक साधारण सभा माघ ३० गते बिहान ११ बजे धुम्रबराही भेन्यु, धुम्रबाराही, काठमाडौंमा बोलाएको छ। कम्पनीले ०८०/८१ को वार्षिक प्रतिवेदन र वित्तीय विवरण पारित गर्ने तथा चालू आर्थिक वर्षका लागि लेखापरीक्षक नियुक्ति र पारिश्रमिक निर्धारण गर्ने प्रस्ताव सभामा पेश गर्नेछ। सञ्चालक समितिको हेरफेर र अनुमोदनसम्बन्धी निर्णय पनि सभाले गर्नेछ। कम्पनीले यसपटक लाभांश प्रस्ताव गरेको छैन। साधारण सभा प्रयोजनका लागि माघ १३ गते बुक क्लोज गरिनेछ। माघ १० गतेसम्म कायम सेयरधनीहरूले मात्र सभामा भाग लिन र लाभांश प्राप्त गर्न पाउनेछन्।

श्रीजनशील लघुवित्तको वार्षिक साधारण सभा माघ २७ गते बिहान ९ बजे होटल पावन मिथिला थाली, गोलबजार ६ मा बस्नेछ। सभामा आर्थिक वर्ष २०८०–८१ को नाफा नोक्सानमाथि छलफल हुनेछ भने आर्थिक वर्ष २०८१–८२ का लागि लेखापरीक्षक नियुक्ति र पारिश्रमिक निर्धारण गरिनेछ। कम्पनीले यसपटक लाभांश वितरणको प्रस्ताव नगरेकाले सेयरधनीले लाभांश पाउने छैनन्। साथै, अन्य वित्तीय संस्थासँग मर्जर वा एक्विजिशन गर्न तथा प्रबन्धपत्र र नियमावली संशोधन गर्न सञ्चालक समितिलाई अख्तियारी दिने प्रस्ताव पनि राखिनेछ। सभा प्रयोजनका लागि माघ १८ गते बुक क्लोज हुनेछ, जसअनुसार माघ १७ सम्मका सेयरधनीले मात्र सभामा भाग लिन पाउनेछन्।

सानिमा बैंकले संस्थापक सेयरधनीको नाममा रहेको ४९ हजार ५० कित्ता सेयर बिक्रीमा ल्याएको छ । उक्त सेयरमा इच्छुक जो कोही व्यक्ति संघसंस्थाहरुले आवेदन दिन सक्नेछन् । सेयरको न्यूनतम मुल्य १४५ रुपैयाँ तोकिएको छ ।सेयर खरिद गर्न इच्छुक जो कोहीले आज (माघ ३ गते) बाट १५ दिन भित्र यस बैंकको केन्द्रीय कार्यालय, नारायणचौर, नक्साल, काठमाडौंमा आवेदन दिनु पर्नेछ ।