अब ट्राफिक नियम उल्लङ्घन गर्ने चालकहरूले अनलाइनबाटै सचेतना कक्षा लिन सक्ने व्यवस्था गरिएको छ। यसअघि भौतिक रूपमा सञ्चालन हुँदै आएको कक्षा अब ‘नागरिक एप’मार्फत अनलाइन हुने उपत्यका ट्राफिक प्रहरी प्रमुख एसएसपी नवराज अधिकारीले बताए। मादक पदार्थ सेवन, रातो बत्ती उल्लङ्घन, ओभर स्पिड र लेन क्रस गर्नेहरूलाई यो सुविधा लागू हुनेछ। गृह मन्त्रालयले औपचारिक रूपमा शुभारम्भ गर्ने तयारी गरेको छ। कोरोना संक्रमणको समयमा परीक्षणका रूपमा सञ्चालन गरिएको यो अनलाइन कक्षा अब स्थायी रूपमा लागू गरिने भएको हो। यसले चालकहरूलाई सजिलो र छिटो सचेतना कक्षा लिन सहयोग पुर्याउनेछ।
